Охрид, 27. мај 2023 (ОХРИДПРЕС) – И покрај неизвесноста изминатов период, матурантите денеска го полагаат првиот екстерен испит од државната матура, како што и беше планирано.
Првиот испит е македонски јазик и литература, албански јазик и литература и турски јазик и литература.
Од охридската гимназија „Св. Климент Охридски“ го објавија и распоредот за полагање.
Полагањето започнува во 10:00 часот, учениците треба да бидат во училиштето половина час пред испитот и со себе да носат документ за лична идентификација.
Распоредот на учениците по простории за испитот по Македонски јазик и литература во рамките на Државната матура го објавија и од Од OЕМУЦ „Св. Наум Охридски“ од Охрид.
– Испитот ќе се одржи во сабота, на 27-ми мај 2023 година со почеток во 10:00 часот. Сите ученици кои ќе полагаат треба да бидат на училиште во 09:00 часот, информираат од училиштето.
Државниот испитен центар кон крајот на минатиот месец започна штрајк со барање за повисоки плати, со што беше доведено во прашање полагањето на испитите од државната матура согласно утврдениот календар. Оттаму бараа од МОН да го измени календарот за полагање, но од ресорниот министер беше потенцирано дека ќе се направат напори роковите да се испочитуваат. Шаќири рече дека ги поддржува барањата, но да се види погоден момент за реализирање целосно на тие барања.
И од Сојузот на средношколци како оправдани ги оценија барањата на вработените во ДИЦ, но и потсетија дека како што правото на штрајк е уставно загарантирано и правото на образование исто е дел од Уставот и државна матура мора да има во предвидениот рок. (Крај)
извор: ОхридПрес фото: архива