Охрид, 4. јануари 2017 (ОХРИДПРЕС) – Откако на почетокот на мандатот имаше обид да им држи лекции на новинарите, Градоначалникот на Охрид, Никола Бакрачески, на крајот на мандатот „во војна“ и со еколошките асоцијации.

Тој им припиша политичка пристрасност и обвини дека создаваат погрешна слика за состојбата со заштитеното природно и културно наследство во охридскиот регион, пред телата на УНЕСКО, пренесе агенцијата „Мета“.

– Состојбата е далеку од тој аларм кој сакаат во јавноста да го прикажат некои асоцијации. Истите тие се премногу исполитизирани и имаат преголемо политичко влијание, а многу малку се потпираат на стручни аспекти и изгледа дека тие повеќе сакаат да го нема Охрид во УНЕСКО отколку што навистина се загрижени за заштита на човековата околина, вели Бакрачески.

Бакрачески ова го изјави како одговор на зачестените напади на еколошките здруженија и асоцијации, кои особено жестоко реагираа на плановите за изградба на инфраструктури проекти во Националниот парк Галичица и езерскиот брег.

Меѓу другите, еколозите за ова известија и во Бернската конвенција за заштита на строго заштитени видови кои во Охридско ги има повеќе од 260. (Крај)

извор: Мета фото: архива