Струга, 18. октомври 2017 (ОХРИДПРЕС) – Поради постоење основи на сомнение за сторени казнени дела, „измама на купувачи”,продолжено казнено дело ,,фалсификување или уништување на деловни книги”, СВР Охрид поднесе кривична пријава против Е.Ќ.(46) од струшкото село Велешта како и против С.П. (53) од Вевчани за сторено казнено дело „злоупотреба на службена положба и овластување“.

Во текот на оваа година, пријавениот Е.Ќ. во својство на директор на правениот субјект „Лира 2016“ ДООЕЛ Струга, нелегално набавил 32 метри просторни дрвна маса и со употреба на погодно средство им ги отстранил ознаките. Тој од второпријавениот С.П. вработен референт во ЈП „Македонски шуми-Јабланица“ побарал да им постави службени ознаки – жиг, со цел дрвната маса заедно со друга што ја поседувал (вкупно 45 метри просторни), лажно да ги прикаже дека потекнуваат од државна шума. Потоа, Е.Ќ.  изготвил деловна испратница во која внел лажни податоци и таа исправа со невистинита содржина ја заверил со службен печат и потпис а потоа ја пуштил во правен сообраќај.

На истиот начин, пријавениот Е.Ќ. со помош на сега пријавениот референт во ЈП „Македонски шуми“, изготвил уште три деловни испратници за вкупно 128 метри просторни огревно дрво, во кои внесол лажни податоци. Со таквите дејствија на извршување, на пријавениот Е.Ќ. му била овозможена противправна корист во износ од 307.200 денари. (Крај)

извор: СВР Охрид фото: архива