Скопје, 28. мај 2021 (ОХРИДПРЕС) – Неможноста за електронска наплата на Коридорот 8 кој води до најпознатиот туристички центар во Македонија, Охрид, е причина што на српските државјани не им е овозможена бесплатна патарина во тој правец, е објаснувањето кое за „Слободен печат“ денеска го дадоа од Јавното претпријатие за државни патишта.
– Свесни сме дека ослободувањето од плаќање патарина кон Грција, а не и кон Охрид предизвика голема реакција во јавноста, но нема потреба да се креираат невистини околу одлуката. Објаснувањето е едноставно. Електронска наплата е воведена само на Коридорот 10 кој води кон Грција, а тоа е единствен начин да се регистрира влез на возилото со електронските картички кои ќе бидат доделени на српските државјани. Коридорот 8 кој води кон Охрид се уште не е модернизиран, односно наплатата со електронска картичка е оневозможена. Тоа е причината што српските државјани не се ослободени од плаќање на патарина доколку патуваат во Охрид или Струга, објаснуваат од Јавното претпријатие за државни патишта.
Оттаму додаваат дека иницијативата потекнува од Владата и дека изработката на картички е единствен начин регуларно и законски да се спроведе акцијата.
– Ние како Јавно претпријатие за државни патишта имаме законска обврска да наплатуваме патарина. Не можеме само да ги кренеме наплатните рамки како што се зборува во јавноста. Има одредена катагорија на граѓани за кои важи тоа, како на пример полиција и војска, но апсолутно не смееме да прошуштаме цивилни лица без „покритие“. Некој мора да плати за тоа, а плаќањето е регулирано преку картичките, само така ние законски ќе се покриеме, велат од претпријатието.
Хотелиерите пак неодамна излегоа со најава дека ќе дадат попусти од 10-20 проценти за аранжмани уплатени од српски туристи.
– Најголем дел од хотелите ќе понудат попуст од 20 отсто. Српските туристи овој попуст ќе можат да го искористат летово, но и до крајот на 2021 години, односно ќе можат да добијат попуст и за Нова година. За тоа кој хотел колкав попуст нуди, ќе можат да проверат на веб страниците на хотелите, но и кај агентите доколку планираат да дојдат преку туристичка агенција. На располагање се 20.000 легла, и нормално дека дел од нив ќе бидат пополнети со домашни гости. Ова лето очекуваме дека ќе има исполнетост над 90 отсто, ако продолжи овој тренд да паѓа бројот на заболени, и доколку не се случи некој нов бран, изјави првиот човек на ХОТАМ, Крсте Блажески.
Привилегии за српските туристи најави и првиот човек на Агенцијата за промоција и поддршка на туризмот, Љупчо Јаневски, како бесплатен паркинг и влезници за музеите во Охрид. Останува да видиме колку од ова ќе биде реализирано. (Крај)
извор: Слободен печат/ОхридПрес фото: архива
