Охрид, 5. октомври 2021 (ОХРИДПРЕС) – Во предворјето на црквата „Св. Софија“ во Охрид се одржа првиот академски час на Факултетот за туризам и угостителство за учебната 2021/2022 година.
Свечениот час го отвори Претседателот на студентското собрание на ФТУ – Игор Пешевски кој им посака топло добредојде на новите колеги. Свое обраќање имаа и Продеканот Проф. Д-р Александар Трајков, деканот Проф. Д-р Цветко Андреески и ректорот на УКЛО Проф. Д-р Сашо Коруновски, како и претставник од СН Осигурителен Брокер АД Битола и директорот на студентскиот дом „Никола Карев“.
– Факултетското Студентско Собрание претставува орган на ФТУ т.е. единствено легитимно тело каде што студентите имаат своја организација. Целта на ФСС е подобрување и развој на студентскиот стандард, истакна Претседателот на ФСС – Игор Пешевски кој им посака добредојде на своите нови колеги.
Тој апелираше до новите студенти активно да се вклучат и да учествуваат во работата на ФСС. Пешевски се заблагодари за големата поддршка од страна на професорите и управата на факултетот. Студентите кои минатата година активно учествуваа и работеа за ФСС добија плакети, со што ФСС им се заблагодари за залагањето. За крај додаде „Ова да биде добар пример за понатаму, дека оние студенти кои работат и се трудат, на крајот нивната работа ќе се исплати!“
На свечениот час се обрати и директорот на студентскиот дом „Никола Карев“ кој изјави дека студентите го направиле вистинскиот избор и ги покани да го посетат студентскиот дом.
Од името на компанијата СН Осигурителен брокер АД Битола новите бруцоши ги поздрави м-р Александра Дуковски. Таа ја нагласи стратешката соработка што СН Осигурителен брокер ја воспостави и развива со УКЛО – Битола, а се однесува на реализација на практична настава на студентите од студиската програма по Осигурување во компанијата, стипендии и вработувања на студенти од Факултетот за туризам и угостителство во Охрид, наградни конкурси за студентите од насоката Осигурување и слични активности во насока на поврзување на образованието и практиката. Таа им посака на студентите среќна и успешна студиска година, со надеж дека некои од нив во иднина ќе бидат дел од тимот на СН Осигурителен брокер АД Битола.
Продеканот за настава Проф. Д-р Александар Трајков даде свое излагање и ги запозна студентите со работата на ФТУ.
– Нашиот факултет е еден од најстарите факултети во Македонија и дел од вториот најстар Универзитет Св. Климент Охридски-Битола. Ќе работите со повеќе од 33 професори – доктори на науки од соодветните области на студирање и ќе имате извонредни услови за студирање како што се современо опремени предавални, амфитеатар, кујна, бифе, библиотека, компјутерска училница и ќе имате пристап до учебници и учебни помагала. Факултетот е авангарда во високото образование во Македонија и нуди студиски програми кои се во склад со побарувачката на труд. Факултетот нуди можност за користење државни стипендии, но исто така и европски стипендии кои би им овозможиле бесплатно студирање во странство., истакна Трајков.
Деканот, Проф. Д-р Цветко Андреески апелираше до новите академски граѓани дека треба да бидат промотери на знаењето и културата на ФТУ и културата на овој град. Тој додаде дека студентите ќе имаат можност да работаат и со професори од странство. Поради пандемијата, наставата ќе се одвива на хибриден начин, дел од наставата ќе се одвива online, а дел со физичко присуство.
Ректорот на УКЛО, Проф. Д-р Сашо Коруновски нагласи дека „образованието е најважниот ресурс на 21век, образованието е нафтата на 21век”. Тој посебно ја нагласи симболиката на локацијата – мудроста која произлегува од учењето и стекнувањето на нови знаења. За крај, ректорот ги мотивираше бруцошите со мислата „Човек учи додека е жив.“ (Крај)
извор: ФТУ/Фани Милошева фото: ФТУ
